Mutevedzeri wemutungamiri weZanu PF Cde Kembo Mohadi vakati bato iri richasvika 5 million votes musarudzo dza2023 sezvo vanhu vaona zvibereko zvemabasa ebudiriro ari kuitwa neSecond Republic inotungamirwa naVaMnangagwa.
Cde Mohadi, vanove zvakare Second Secretary webato, vari kuita musangano wenyika yose nemasangano ehutungamiriri hweZanu PF sezvo bato riri kutonga richitsvaga kusimbisa rutsigiro rwayo.
NeChipiri vakasangana nehutungamiriri hwebato kuMatabeleland North Province kumaoffice eZanu kuLupane.
Muhurukuro yakaitwa kuGwanda, Matabeleland South Province zvichitevera musangano wevatungamiriri vebato kubva mudunhu iri nezuro, Cde Mohadi vakati Hurumende yakabudirira kuita zvirongwa zvekuchengetedza chikafu zvakaita sekuvandudza zvirongwa zveirrigation schemes, kuvandudza zvivakwa zvakaita semigwagwa, mabridge nemadam uye kuvakwa kwezvikoro nemaclinic.
Musangano uyu wakapindwa nehutungamiriri hwebato kubva kumatunhu makuru kusvika kumatunhu vachitevedzera mitemo yeCovid-19.
Vese vakapinda vakatetswa Covid-19. Vakuru vematunhu eGovernment Departments vakaendesawo mareports ezvirongwa zvaive zvichiitika uye budiriro yakaitwa
“Hurumende yeZanu PF yakaita zvakawanda mukupa zvivimbiso pasarudzo,” vakadaro Cde Mohadi.
“Tikatarisa kudunhu reMatabeleland South, tine zvirongwa zvekuchengetedza chikafu kwatinotaura nezvekumutsidzirwa kwezvirongwa zveirrigation, tikatarisa kuvandudzwa kwezvivakwa, tine migwagwa nemadam.
“Kune zvakare zvikoro nemaclinic zvakavakwa. “Mari yeDevolution yakaunza zvibereko zvakanaka kuMatabeleland South kuburikidza nekugadzirisa zvivakwa zvakasiyana.”
Hurumende iri pasi peSecond Republic iri kutsigira zvirongwa zvinosanganisira kuvaka Tuli-Manyange Dam, kugadzirwa kweZhobe Irrigation Scheme 2 500 hectares , kugadzirisa zvirongwa zveIrrigation scheme kuTshikwalakwala, Sebasa neGuyu Chelesa, pakati pezvimwe zvirongwa.
Cde Mohadi vakati pamusangano uyu maererano nebudiriro nekusimudzira kubatana. Vakati bato iri raifanirwa kuenda kusarudzo rakasimba uye rakabatana.
Sachigaro weZanu PF kuMatabeleland South, sachigaro wedunhu, Cde Never Khanye, vakati Cde Mohadi vakavasiya vane basa rekubatana pamwe nekushanda pamwe chete nemapazi ehurumende kuita zvirongwa zvekuendesa masimba kumatunhu.
