Mumwe musikana ane makore gumi nemanomwe ekuberekwa kubva kwaMutasa Village uyo aiita Form 5 paBuhera High School akatsikwa nemotokari yeBuhera Rural District Council apo aiyambuka Chivhu – Nyazura Highway Muvhuro wadarika.
Grace Pasipanodya akabva afira pakarepo.
Kuedza kuwana chirevo kubva kuMutauriri wemapurisa kuManicaland Inspector Luxson Chananda zvakashaya basa.Sachigaro weBuhera RDC, Ngoni Musakaruka, zvakadaro, akatsigira chiitiko ichi.
Tsaona iyi yakaitika pa85 km peg padhuze neMutasa Business Center apo Eliah Takangovada uyo aityaira Nissan NP300 chena yaive neBuhera RDC yakatsika Pasipanodya uyo aiyambuka mugwagwa mushure mekuburuka mutekisi.
Grace akavigwa neChitatu kumba kwaPasipanodya kuMutasa Village pasi paSabhuku Makumbe.
