Yakave bata-batai paWadzanai Primary School iri muguta reHarare apo mazana evabereki vakakomba chikoro ichi vachiti vanoda kudzoserwa mari dzavo dzechiokomuhomwe idzo dzavanoti vakabvisiswa nedzimwe nhengo dzeSchool Development Committee (SDC) vachinzi vaizowaniswa nzvimbo dzevana veGrade 1 asi ndokuzodzishaya.
Kuungana kwakaita vabereki uku kunopesana nemitemo yekurwisa kupararira kweCovid-19 iyo isingatendere vanhu vanodarika 50 kuungana panzvimbo imwe chete.
Pachikoro apa pakaitika zhowe-zhowe vabereki ava, avo vanoti vakatengeswa mayunofimu nekubhadhariswa mari dzechikoro, vachiti vaida kudzoserwa mari dzavo.
