Mudzidzisi wepaChiredzi akabhadhariswa faindi ye$40 mushure mekubatwa achiputa mbanje kubhawa kuChecheche Growth Point.
Simbisai Sithole (46) weMahlasera Village munzvimbo yaSabhuku Gudo, uyo anoshanda semudzidzisi paZungudza Primary School kuChiredzi, akamira pamberi pemutongi wedare reChipinge, achipomerwa mhosva yekuputa zvisiri pamutemo nemaune zvinodhaka uye zvine njodzi.
Muchuchisi, VaThulani Zondwayo, vakaudza dare kuti musi waChikumi19, mapurisa akanga ari papatrol akaona Sithole achiputa mbanje muZineku Bar kuChecheche Growth Point, vakasvika ipapo ndokumusunga.
Achibvunzwa kuti sei achiputa fodya, Sithole akateterera kuti aregererwe, achiti aisasvuta fodya.
Ndiri kukumbira dare kuti rindiregerere. Handisi chidhakwa chembanje. Imhaka yekuti ndairwara nemusoro uye ndakazopihwa zano rekuti ndipute fodya kuti ndipore.
Sithole akaripiswa faindi inosvika $40 kana asina ogara mugeri kwemazuva40.
