Varume vaviri vanobva mumusha weDumuzweni pasi paSabhuku Ntabeni kuZhombe vari mumaoko emapurisa mushure mekunge vauraya murume ane makore 24 ekuberekwa wavakange vaine chigumbu naye chakakura kubvira kare.
Chiitiko ichi chakaitika masikati panzvimbo inonzi Majanjathini Tuckshops uko mushakabvu nemukoma wake vainwa doro.
Mamiriro ezvinhu aive ekuti Allen Ndlovu nemunin’ina wake Thokozani Ndlovu (24) vaive kuMajanjathini Tuckshops uko kwavakasangana naTarisai Makore (36) uyo wavakagumburana naye.
Kusanzwisisana kwakamuka pakati pehama dzaNdlovu naMakore, Allen Ndlovu aive akapakata banga akatema Makore nebanga.
Hama mbiri dzaMakore, Mavhu Makore (38) naVusa Mpinga (25) vakapinda muhondo iyi uye hama dzaNdlovu nekutya kukurirwa vakatiza kubva munzvimbo iyi.
Vaviri ava, (Mavhu Makore naMpinga) vakabva vabata mufi Allen Ndlovu vakamutorera banga vasati vabaya naro nemuviri wese, ndokumusiya akuvara zvakanyanya.
Nyaya iyi yakamhan’arwa kumapurisa, Ndlovu akaendeswa kuKwekwe General Hospital kwaakasvikofira.
Mutauriri wemapurisa kudunhu reMidlands, Inspector Emmanuel Mahoko vakurudzira veruzhinji kuti vagadzirise makakatanwa nenzira dzekutaurirana pane kuti varwisane izvo zvinozokonzera kuurayana.
