Mudzidzisi wepachikoro cheZRP High School akamira pamberi peHarare Magistrates Court achipomerwa mhosva yekubata chibharo mwana paaitisa zvidzidzo zveScience mulaboratory.
VaCharles Mlambo (49) havana kubvunzwa kuti vakumbirire mhosva yavaipomerwa iyi, vakamiswa pamberi pemutongi wedare, VaDennis Mangosi, avo vakavaisa mutirongo kusvika 3 August.
Hurumende inotungamirwa naVaAnesu Chirenje inotaura kuti nemusi wa18 Chikunguru nenguva dza10 mangwanani, mwana ane makore gumi nemashanu akaenda kuOrdinary Level laboratory kunoitwa maSciences.
Mwana uyu aive nezvidzidzo zviviri kubva na10 am kusvika masikati.
Munguva yechidzidzo, uyu ane makore gumi nemashanu anonzi akaudza mudzidzisi wake kuti rabhoritari yaitonhora zvakanyanya uye akataura kuti vawane kamuri inodziya yavaigona kuitisa chidzidzo ichi. Dare rakanzwa kuti Mlambo akataura kuti vashandise hofisi yake iri murabhoritari.
Vari mukati mehofisi, Mlambo akabvisa bhurugwa rake ndokukurura mwanasikana uyu yunifomu zvechisimba kwakuzomubata chibharo. Mushure mekurwiswa, musikana uyu akaenda kumudzidzisi weBiology uyo akasvitsa shoko iri kuvabereki.
Vabereki vemusikana uyu vakaendesa nyaya iyi kumapurisa zvakaita kuti VaMlambo vasungwe uye vachizomira pamberi pedare vachipomerwa mhosva yekubata chibharo.
