Makorokoza anofungidzirwa kuti ndevekuchera goridhe vakamiswa pamberi pedare redzimosva vachipomerwa mhosva yekurova pamwe nekubira mapurisa maviri.
Mbekezeli Brighton Sibanda, Michael Khumalo, Lindani Mpala naBhekani Ndlovu varamba mhosva yavari kupomerwa pamberi pemutongi wedare ramejasitiriti wedunhu reBulawayo VaDambudzo Malunga neChipiri.
Sekurehwa kwenyaya iyi Hurumende, yakapihwa humboo huzere naprosecutor Naison Chivayo, muna Ndira gore rapfuura, mumwe anofungidzirwa kuti mupurisa akadhakwa aibva kuzvitoro zvePelandaba West akananga kumba kwake kuPumula South.
“Ari munzira akasangana nevarume vangangosvika vatanhatu vaive nematochi pahuma, vakabva vamutorera nharembozha yake asati atiza neupenyu hwake,” vakadaro VaChivayo.
Mushure mekumhanyiswa akabatwa ndokurohwa nesimbi ndokubaiwa nebanga reokapi padivi pemhuno ndokutorerwa nharembozha yeSamsung Trend inosvika US$25.
Mumwe mupurisa ndiye akazomununura asi akatandaniswawo nemakorokoza egoridhe avo vakasiya kurova mumwe mupurisa ndokumhanya vachimutevera kumba kwake uko kwainge kwave nemastand matatu uko kwavakaparadza mahwindo ake ndokupinda zvisiri pamutemo vachida kumubira motokari.
Nyaya iyi yakamhan’arwa kumapurisa izvo zvakazoita kuti makorokoza aya abatwe nemapurisa ndokusungwa.
– Sunday News
